سری نگر :۴۱،فروری:مرکزی وزیر داخلہ امت شاہ نے پیرکولیفٹنٹ گورنر منوج سنہا اور جموں وکشمیر کے اعلیٰ سول اور پولیس افسران کے ساتھ مرکزی اور یوٹی دونوں سیکٹروں میں ترقیاتی کاموں کی پیش رفت، سیکورٹی کے منظر نامے اور مرکز کے زیر انتظام جموں و کشمیر میں تجاوزات کے خلاف جاری مہم کا جائزہ لیا۔وزارت داخلہ کی یہ جائزہ میٹنگ نئی دہلی میں تقریباً ایک گھنٹے تک جاری رہی۔جے کے این ایس کے مطابق جموں وکشمیر کے لیفٹنٹ گورنر منوج سنہاکے علاوہ مرکزی داخلہ سکریٹری اے کے بھلا،جموں وکشمیرکے چیف سکریٹری ڈاکٹر ارون مہتا اورسیول و پولیس انتظامیہ کے دیگر سینئر افسران نے بھی میٹنگ میں شرکت کی۔ایک میڈیا رپورٹ میں سرکاری ذرائع کاحوالہ دیتے ہوئے رپورٹ کیاگیا کہ جموں وکشمیرمیں چھوٹے زمینداروں کو انسداد تجاوزات مہم سے بچانے کےلئے ایک پالیسی پرجائزہ اجلاس میں بڑے پیمانے پر غور کیا گیا۔ذرائع نے کہا کہ مبینہ طور پر پالیسی کو شکل دے دی گئی ہے اور بہت جلد اس کا اجراءہو سکتا ہے۔ذرائع کے مطابق جموں و کشمیر انتظامیہ نے پالیسی کا مسودہ تیار کیا تھا اور مرکزی وزیر داخلہ کے ساتھ اس اہم میٹنگ میں اس پر تبادلہ خیال کیا گیا۔ پالیسی اب تقریباً منظور ہو چکی ہے اور میٹنگ میں طے پانے والے اتفاق رائے کی بنیاد پر اسے حتمی شکل دینے کے بعد بہت جلد باہر کر دیا جائے گا۔غور طلب ہے کہ لیفٹنٹ گورنر منوج سنہا نے بارہا لوگوں کو یقین دلایا ہے کہ چھوٹے زمینداروں کو انسداد تجاوزات مہم سے بچایا جائے گا۔ ذرائع نے بتایا کہ اس پہلو کو مدنظر رکھتے ہوئے پالیسی کا مسودہ تیار کیا گیا ہے۔ذرائع نے مزید بتایا کہ جموں و کشمیر انتظامیہ نے مرکزی وزیر داخلہ کو جاری انسداد تجاوزات مہم کے دوران حاصل ہونے والے حوصلہ افزا نتائج کے بارے میں تفصیلی بریفنگ دی جس میں کئی ہزار کنال پر مشتمل اراضی کو بااثر افراد کے قبضے سے واگزار کرایا گیا ہے۔میڈیا رپورٹ کے مطابق انسداد تجاوزات مہم کے علاوہ، مرکزی وزارت داخلہ امت شاہ نے جموں و کشمیر میں مرکزی معاونت والی اسکیموں اور وزیر اعظم کے ترقیاتی پیکیج کے تحت جاری پروجیکٹوں وکاموں کا جائزہ لیا، اس کے علاوہ یو ٹی انتظامیہ کی طرف سے اپنے طور پر کئے گئے ترقیاتی کاموں کا بھی جائزہ لیا۔جموں و کشمیر انتظامیہ نے وزیر داخلہ کو مرکزی کے ساتھ ساتھ یوٹی سطح کے سیکٹروں میں مختلف پروجیکٹوں اور اسکیموں پر ہونے والی پیشرفت اور جموں وکشمیر حکومت کی طرف سے عمل آوری کرنے والی ایجنسیوں کو ٹائم لائن پر پورا اترنے کی ہدایت کے بارے میں آگاہ کیا۔ ذرائع نے مزید کہا کہ حکومت نے جموں وکشمیرکی تیز رفتار ترقی کی یقین دہانی کرائی اورکہاکہ جاری منصوبوں اور مزید اسکیموں کے لیے فنڈز کا کوئی مسئلہ نہیں ہوگا جن کا جلد اعلان کیا جائے گا۔جموں و کشمیر کے سینئر افسران نے وزیر داخلہ کو آن لائن کی جانے والی متعدد خدمات کے بارے میں آگاہ کیا اور انتظامیہ کی طرف سے وقت کا پابند بنایا گیا جس سے بہت سے لوگوں کو فائدہ ہوا۔وادی میں کشمیری پنڈتوں کےلئے ٹرانزٹ رہائش کا مسئلہ بھی یوٹی کے نمائندوں کے ساتھ میٹنگ میں نمایاں طور پر سامنے آیا جس میں وزیر داخلہ کو یقین دلایا گیا کہ کام تیزی سے ہے اور ڈیڈ لائن کو پورا کرے گا
