سری نگر:۸۱،فروری:سابق ڈی ایس پی دیویندر سنگھ سے اسلحہ اور گولہ بارود کی برآمدگی کے معاملے میں ایک اہم پیش رفت کے بطور قومی تحقیقاتی ایجنسی (NIA) نے جموں و کشمیر میں ملی ٹنٹوں کے زیر استعمال3نجی کاروں کو ضبط کیا۔جے کے این ایس کے مطابق این آئی اے کے ایک سینئر افسر نے ہفتہ کومیڈیا کو بتایا کہ یہ تینوں گاڑیاں 15فروری کوضبط کی گئیں۔ قومی تحقیقاتی ایجنسی (NIA) کے سینئر افسر نے بتایاکہ ہم نے 3نجی گاڑیاں ضبط کیںجن میں Hyundi-i20،Maruti-800 اورHyundi-i20 Sportzشامل ہیں ۔این آئی ا ے نے مزیدکہاکہ ان تینوں نجی گاڑیوں کا استعمال ملزمان نے وادی کشمیر میں دہشت گردانہ سرگرمیوں کو بڑھانے کے لئے کیا تھا،اور گاڑیوں کوUA(P) ایکٹ کے سیکشن 25 (1) کے تحت ضبط کیا گیا ۔قابل ذکر ہے کہ یہ مقدمہ حزب المجاہدین کے2 سرگرم ملی ٹنٹوںسمیت4ملزمان کی گرفتاری سے متعلق ہے، جو ایک Hyundi-i20 کار میں دہشت گردانہ کارروائیوں کے لئے مرکز کے زیر انتظام علاقے سے باہر جا رہے تھے۔معلومات کی بنیاد پر، اس کار کو11 جنوری 2020 کو سری نگر جموں قومی شاہراہ پر ال سٹاپ ناکہ پر روکا گیا تھا۔تلاشی کے دوران گاڑی سے ایک اے کے 47 رائفل، 3 پستول، ایک ہینڈ گرنیڈ، گولہ بارود اور دیگر مجرمانہ مواد برآمد کرکے ضبط کیا گیا۔ابتدائی طور پر یہ کیس کولگام کے قاضی گنڈ پولیس اسٹیشن میں درج کیا گیا تھا اور بعد میں اس معاملے کی جانچ این آئی اے نے سنبھال لی تھی۔تحقیقات سے یہ بات سامنے آئی ہے کہ Hyundi-i20کی ملکیت اور استعمال ملزم عرفان شفیع میر کے پاس ہے، Maruti-800 مشتاق احمد شاہ کے نام پر رجسٹرڈ ہے اور اس کے بیٹے ملزم سید نوید مشتاق احمد شاہ کے زیر استعمال ہے، اور Hyundi-i20 Sportz تنویر احمد وانی کے نام پررجسٹرڈاور زیر استعمال ہے۔ تینوں گاڑیوں کووادی کشمیر میں دہشت گردانہ سرگرمیوں کےلئے استعمال کیا جاتا تھا۔ این آئی اے کے اہلکار نے کہاکہ معاملے کی مزید تحقیقات جاری ہے۔
