جی آر-8 بیٹ کمپنی با صلاحیت کھلاڑیوں کو بین الاقوامی سطح تک پہنچنے کےلیے کرے گی پلیٹ فارم فراہم
سرینگر میل سپورٹس ڈیسک
اننت ناگ، 25 فروری: جنوبی کشمیر کے اننت ناگ ضلع کی ایک معروف کرکٹ مینوفیکچرنگ کمپنی نے پہلی بار وادی کشمیر کے باصلاحیت کرکٹرز کو بین الاقوامی سطح تک پہنچنے کے لیے ایک پلیٹ فارم فراہم کرنے کی پہل کی ہے۔
اس سلسلے میں آج کمپنی کے مرکزی آفس ہالمولہ سنگم بجبہاڑہ میں کمپنی کے مالکان کی جانب سے ایک پریس کانفرنس کا اہتمام کیا گیا، جس دوران باصلاحیت مقامی کرکٹ کھلاڑیوں کو بھرپور مدد کرنے کی بات کہی گئی۔
بیٹ کمپنی Gr8 Sports نے کشمیر کے ٹیلنٹ کو آگے بڑھانے کے لیے مختلف بین الاقوامی کرکٹ بورڈز اور لیگز کے ساتھ ایم او یو پر دستخط کیے ہیں۔
کمپنی کے مالک فوضل کبیر نے کہا کہ کشمیر میں کرکٹ کھلاڑی بہت زیادہ باصلاحیت ہیں لیکن ان کے پاس میگا سٹیج تک پہنچنے کے لیے پلیٹ فارم کی کمی تھی۔
انہوں نے کہا کہ ان کی کمپنی نے اب مقامی کھلاڑیوں کے لئے ایک پلیٹ فارم فراہم کرنے کے لیے پہل کی ہے تاکہ کھلاڑیوں کو بین الاقوامی سطح تک پہنچنے اور اپنی صلاحیتوں کو ثابت کرنے کا موقع ملے۔
کبیر کے مطابق باصلاحیت پروفیشنل کرکٹرز سوشل میڈیا پر Gr8 Sports کو ٹیگ کرتے ہوئے اپنے سگنیچر شاٹس کی ویڈیوز بنا کر اپ لوڈ کرسکتے ہیں۔
انہوں نے مزید کہا کہ بیٹنگ، بولنگ یا وکٹ کیپنگ کی ہر ویڈیو کا تجزیہ ماہرین کریں گے جس کے بعد بہترین کھلاڑیوں کی شارٹ لسٹ اجراء کی کی جائے گی۔
کبیر نے مزید کہا کہ ہر سال شارٹ لسٹ ہونے والے کھلاڑی بین الاقوامی کرکٹ بورڈز اور انٹرنیشنل لیگ فرنچائزز کی سلیکشن کمیٹی کے ممبران کے سامنے ٹرائلز سے گزریں گے، جو انہیں مختلف لیگز کے لیے منتخب کریں گے۔
