اننت ناگ:۳،مئی : بھارتیہ جنتا پارٹی کی جموں وکشمیر شاخ کے صدر رویندررینا نے بدھ کے روز پیش گوئی کی ہے کہ اُن کی جماعت جموں و کشمیر میں وہ اگلی حکومت بنائے گی۔جے کے این ایس کے مطابق بھارتیہ جنتا پارٹی کی جموں وکشمیر شاخ کے صدر رویندررینا نے بدھ کے روز جنوبی کشمیر کے اننت ناگ ضلع میں میڈیا کے نمائندوں سے بات کرتے ہوئے کہا کہ اس بات کے امکانات ہیں کہ بی جے پی کو جموں و کشمیر میں آنے والے اسمبلی انتخابات میں 50 سے زیادہ سیٹیں ملیں گی اور وہ اپنی حکومت بنائے گی۔رویندررینا نے دعویٰ کیا کہ وادی کشمیر میں پارٹی کے لیے حمایت کی ایک بڑی لہر ہے۔انہوں نے کہا کہ مجھے یقین ہے کہ جب بھی انتخابات ہوں گے بی جے پی اپنی حکومت بنائے گی اور جموں و کشمیر کا اگلا وزیر اعلیٰ بی جے پی سے ہوگا۔رویندررینا نے کہا کہ بڑی تعداد میں لوگ بی جے پی میں شامل ہو رہے ہیں اور جموں و کشمیر میں اپنے گھروں پر خوشی سے جھنڈے لہرا رہے ہیں۔بھاجپا جموں وکشمیر کے صدرنے کہا کہ وزیر اعظم نریندر مودی نے امن کے دشمنوں کے ذریعہ جموں و کشمیر کے لوگوں کے درد کو سمجھا ہے اور انہوں نے ان کی شکایات کو دور کیا ہے۔سجاد لون کے اس بیان پر ردعمل ظاہر کرتے ہوئے کہ بی جے پی اور این سی جموں و کشمیر میں اگلی حکومت بنائیں گے، رویندررینا نے کہا کہ بی جے پی جموں و کشمیر میں اکثریت حاصل کرے گی اور این سی کے ساتھ اتحاد کی ضرورت نہیں ہوگی۔ انہوں نے کہا کہ کشمیر کے لوگ بی جے پی کو اس کی عوام دوست پالیسیوں کی وجہ سے پسند کرتے ہیں اور لوگ آنے والے انتخابات میں پارٹی کو ووٹ دیں گے۔ایک سوال پر انہوں نے کہا کہ الیکشن کمیشن آف انڈیا ایک خود مختار ادارہ ہے اور کسی بھی طرح بی جے پی کے کہنے پر کام نہیں کر رہا ہے۔رویندر رینا نے کہاکہ یہ الیکشن کمیشن کا فیصلہ ہے کہ وہ فیصلہ کرے کہ جموں و کشمیر میں کب انتخابات کرائے جاسکتے ہیں۔انہوں نے تاہم کہا کہ بی جے پی انتخابات کے لیے تیار ہے اور الیکشن کمیشن کو فیصلہ کرنا ہے۔
