سری نگر:۷، جون:جے کے این ایس : فوج کی پندرہویں کور کے سربراہ لیفٹیننٹ جنرل امردیپ سنگھ اوجلا نے کشمیرکی مجموعی سیکورٹی صورتحال کو اطمینان بخش قرار دیتے ہوئے بدھ کے روز کہاکہ کشمیر میں جی20اجلاس کے کامیاب انعقاد کے بعدفوج سالانہ امرناتھ یاترا 2023کے پُرامن اور محفوظ انعقادکویقینی بنانے کیلئے پوری طرح سے تیار ہے ۔اس دوران بارڈر روڈز آرگنائزیشن کے انچارج چندن واڑی نے کہاکہ سالانہ امرناتھ یاترا کے پیش نظر پہلگام راستے پر بحالی کاکام زوروشور سے جار ہے ۔جے کے این ایس کے مطابق فوج کی 15ویں کورکے کمانڈنگ آفیسر لیفٹیننٹ جنرل امردیپ سنگھ اوجلا نے کہاکہ فوج نے کئی خطرات کے درمیان کشمیر میں G20 سربراہی اجلاس کی کامیاب تکمیل کا یقینی بنایا اور اب فوج سالانہ امرناتھ یاترا کی حفاظت کے لیے پوری طرح تیار ہے۔انہوںنے یقین دلایا کہ کشمیر میں صورتحال’بہت اچھی‘ ہے۔انہوںنے کہاکہ کشمیر وادی میں عمومی صورتحال قابو میں ہے۔ دراندازی اس سال نہیں ہوئی۔ کمانڈنگ آفیسر لیفٹیننٹ جنرل امردیپ سنگھ اوجلا نے مزیدکہاکہ ہم نے اس سال کامیاب جی20 میٹنگیں مکمل کیں،اور جہاں تک ہمارے انسداد دراندازی کے گرڈ کا تعلق ہے،توہم زمین پر بہت مضبوط ہیں۔خطے میں بنیاد پرستی کے بارے میں بات کرتے ہوئے انہوں نے کہا کہ اس کی کوششیں بڑھی ہیں لیکن اثرات کم ہوئے ہیں۔ فوج کی 15ویں کورکے کمانڈنگ آفیسرنے کہاکہ بنیاد پرستی وہیں ہے ،جہاں سوشل میڈیا کو اپنے بھرپور اثر کے لئے استعمال کیا جاتا ہے اور وہیں سے نوجوان متاثر ہوتے ہیں۔ انہوںنے کہاکہ بنیاد پرستی کی کوششیں بڑھی ہیں لیکن اثرات کم ہوئے ہیں۔لیفٹیننٹ جنرل امردیپ سنگھ اوجلا نے مزید کہاکہ عوام اور نوجوانوں کو پتہ چل گیا ہے کہ غلط کیا ہے اور صحیح کیا ہے۔انہوںنے کہاکہ نوجوانوں کے لیے میرا پیغام ہے،براہ کرم سمجھیں اور صحیح اور غلط میں فرق کریں۔ آپ کو صحیح اور غلط کے درمیان فرق کرنا ہے۔لیفٹیننٹ جنرل امردیپ سنگھ اوجلا نے مزید یقین دلایا کہ ٹھوس اور مضبوط ہندوستانی فوج سرحد پار سے کسی بھی غیر معمولی خطرے سے نمٹنے کے لیے تیار ہے۔تاہم، کمانڈنگ آفیسر نے بڑھتی ہوئی ’نارکو دہشت گردی‘ عرف منشیات پر مبنی دہشت گردی پر تشویش کا اظہار کیا۔