سری نگر:۰۲، جولائی:جے کے این ایس : مسلسل دوسرے روز سری نگراورجموں سمیت بیشترعلاقوں میں گرمی کی شدت برقرار رہنے اور کچھ علاقوںمیں بادل چھائے رہنے کے بیچ محکمہ موسمیات نے جمعرات کوکہاکہ23جولائی تک جموں خطے کے بہت سے مقامات پروقفے وقفے سے گرج چمک کیساتھ ہلکی اوردرمیانی بارش متوقع ہے،تاہم کشمیروادی کے کچھ ایک مقامات پرہی بارشوں کاامکان ہے ،اُدھر موسمیاتی ماہرین نے اگلے5دنوں تک موسمی صورتحال ابتررہنے کی پیش گوئی کرتے ہوئے خبردار کیاکہ اس دوران ہلکی سے بھاری بارش ہونے کیساتھ ساتھ کہیں کہیں ژالہ باری ،بادل پھٹنے ،اورسیلابی ریلوں کاامکان ہے ۔اس دوران جمعرات کو سری نگر اور جموںمیں دن کادرجہ حرارت باترتیب31سے35ڈگری سینٹی گریڈ رہا جبکہ جموں وکشمیر کے باقی بیشتر علاقوںمیں بھی گرمی کی شدت کازور جاری رہا۔جے کے این ایس کے مطابق سری نگرسمیت کشمیر وادی میں جمعرات کوموسم خشک اور گرم رہاجبکہ محکمہ موسمیات کے مطابق جموں و کشمیر کے بیشتر مقامات پر عام طور پر مطلع ابر آلود ہے۔سری نگرمیں قائم محکمہ موسمیات کے علاقائی مرکز کے ڈپٹی ڈائریکٹر ڈاکٹر مختار احمد نے جمعرات کودن کے ایک بجکر 12منٹ پر ایک ٹویٹ میں جانکاری فراہم کی کہ اسوقت جموں و کشمیر کے بیشتر مقامات پر عام طور پر مطلع ابر آلود ہے۔انہوں نے کہاکہ20سے23جولائی تک جموں کے بہت سے مقامات پر وقفے وقفے سے گرج چمک کیساتھ ہلکی سے درمیانی بارش متوقع ہے ،ڈاکٹر مختار کے بقول جموں خطہ کے کچھ مقامات پر مذکورہ مدت کے دوران خاص طور پر دیر رات اورصبح کے اوقات میں موسلادھار بارش ہو سکتی ہے۔انہوں نے کہاکہ لوگوں کو مشورہ دیا جاتا ہے کہ وہ محتاط رہیں اور ندیوں،نالوں اور سیلاب کے خطرے والے علاقوں سے دور رہیں۔اس دوران کشمیر ویدر نامی ایک موسمیاتی گروپ کی جانب سے جموں وکشمیر کے موسم سے متعلق تازہ جانکاری دی گئی ۔متعلقہ گروپ کے مطابق جموں و کشمیر کے کچھ علاقوں میں آج یعنی جمعرات کو بالخصوص دوپہر اور شام کے درمیان بارش کا امکان ہے۔گروپ کے مطابق شدید بارشوں اور سیلاب کے امکان کو خارج از امکان قرار نہیں دیا جا سکتا۔تاہم گروپ نے واضح کیاکہ مجموعی طور پر، آج بڑے پیمانے پرموسم خراب ہونے کی توقع نہیں ہے۔کشمیر ویدر نے اگلے5دنوں کے دوران موسمی تغیروتبدل سے متعلق کہاکہ اس دوران ہلکی سے بھاری تک مختلف شدت کے ساتھ وقفے وقفے سے بارش کی توقع ہے۔جبکہ اس دوران کچھ علاقوں میں ژالہ باری، بادل پھٹنے، شدید بارش اور سیلاب کا امکان ہے۔ جموں سری نگر
