سری نگر:۰۲، جولائی:جے کے این ایس : رواں سال کی آخری سہ ماہی میں بلدیاتی انتخابات کی بازگشت کے بیچ جمعرات کوسابق چیف سیکرٹری بی آرشرما نے ریاستی الیکشن کمشنر کے طور پر حلف لیا۔اس موقعہ پرانہوںنے کہاکہ اپنے فرائض کو ایمانداری اورلگن کیساتھ انجام دینا اُس کی کوشش اورترجیح ہوگی ۔جے کے این ایس کے مطابق جموں و کشمیر کے لیفٹیننٹ گورنر منوج سنہا نے جمعرات کو یہاں راج بھون میں سابق چیف سکریٹری بی آر شرما کوجموں و کشمیر کے ریاستی الیکشن کمشنر کے طور پرحلف دلایا۔سابق بیورﺅ کریٹ بی آر شرما کو گزشتہ ہفتے ریاستی الیکشن کمشنر مقرر کیا گیا تھا۔ بی آر شرما65 سال کی عمر تک ریاستی الیکشن کمشنرکے عہدے پر فائز رہیں گے۔رج بھون سری نگرمیں منعقدہ حلف برداری تقریب میں لیفٹنٹ گورنر کے مشیرراجیو رائے بھٹناگر،چیف سیکرٹری ڈاکٹر ارون کمار مہتا اور انتظامیہ کے دیگر کئی سینئر افسران بھی موجود تھے ۔اس موقعہ پر نومقررہ ریاستی الیکشن کمشنربی آر شرما نے کہاکہ میں خود کواس اہم عہدے کیلئے نامزد کئے جانے پر فخر محسوس کررہاہوں ۔انہوںنے کہاکہ اپنے فرائض کو ایمانداری اورلگن کیساتھ انجام دینا اُس کی کوشش اورترجیح ہوگی ۔جموں خطے کے کٹھوعہ ضلع سے تعلق رکھنے والے 1984 بیچ کے آئی اے ایس افسر بی آر شرما نے 2015 سے 2017 تک سابقہ ریاست جموں و کشمیر کے چیف سکریٹری کے طور پر خدمات انجام دیں۔وہ مرکزی وزارت داخلہ میں ایڈیشنل سکریٹری کےساتھ ساتھ جموں و کشمیر کے چیف الیکٹورل آفیسر کے طور پر بھی خدمات انجام دے چکے ہیں۔یہاں یہ بات قابل ذکر ہے کہ جموں وکشمیرمیں رواں سال کے آخرمیں بلدیاتی انتخابات کرائے جانے کاامکان ہے جبکہ اگلے سال پارلیمانی انتخابات کیساتھ ساتھ جموںو کشمیرمیں اسمبلی انتخابات کرائے جانے کابھی امکان ہے ،جس کامطالبہ تمام سیاسی جماعتیں کافی عرصے سے کرتی آرہی ہیں
