سرینگر/ جمیل انصاری/ یہ بات باعثِ طمانیت ہے کہ کشمیر میں فنِ خطاطی کو نئے سرے سے ایک نئی جہت دینے اور اس فن کو زندہ و جاوید رکھنے کی غرض سے جموں و کشمیر حکومت کے محکمہ ثقافت اور کلچرل اکیڈیمی کے اہتمام سے فنِ خطاطی کا دس روزہ ورکشاپ اختتام پذیر ہوا۔اختتامی تقریب پر محکمہ ثقافت کے کمشنر سیکریٹری سید عابد رشید نے متذکرہ ورکشاپ میں حصہ لینے والے طلبا کو اسناد سے نوازا۔ اس موقعے پر عابد رشید نے کہا کہ یہ ورکشاپ فنِ خطاطی کے تعلق سے ایک مثبت امید کے ساتھ اختتام پذیر ہوا کہ نئی پود اس فن کے ساتھ دلچسپی سے وابستہ ہوئی، جو اس اس بات کی علامت ہے کہ خطاطی کا فن زندہ و جاوید رہے گا کیونکہ اس کے ساتھ اب نئی پود وابستہ ہوئی۔ انہوں نے طلباءاور اس فن سے وابستہ فنکاروں کو یقین دلایا کہ حکومت اس فن کو فروغ دینے کے تعلق سے حتی المقدور کوششیں کرے گی۔ یاد رہے اس سے قبل پانچ روزہ خطاطی کیمپ کی کامیابی کے حوالے سے تذکرہ کرتے ہوئے کمشنر سیکریٹری نے کہا کہ اس کیمپ میں شریک خطاطوں نے ملک کے وزیر داخلہ شری امت شاہ کو اتنا متاثر کیا کہ انہوں نے اپنی تقریر میں اس بات کا برملا اظہار کیا کہ مجھے کشمیر کے کلاکاروں نے امیت شاہ جیسے نام کو کئی زبانوں میں لکھ کر میرے جیون کا سب سے انمول تحفہ پیش کیا۔
