بشارت رشید
پلوامہ: جہاں وادی کشمیر کے اطراف و اکناف میں کرکٹ مقابلوں کے انعقاد کا عمل بدستور جاری ہے، وہی جنوبی کشمیر کے نورپورہ اونتی پورہ میں جمعرات کو نورپورہ کرکٹ پرائمیر لیگ کا فائنل میچ بھی کھیلا گیا۔ ٹورنامنٹ کے منتظمین کے مطابق فائنل میچ نورپورہ اور مڑہامہ کی کرکٹ ٹیموں کے مابین کھیلا گیا، جس دوران جموں کشمیر بی جے پی کے ترجمان الطاف ٹھاکر مہمان خصوصی کے بطور موجود رہے، جبکہ میچ دیکھنے کے لیے شائقین کھیل کی ایک بڑی تعداد بھی موجود تھی۔ فائنل میچ میں نورپورہ کی ٹیم نے مڑہامہ کی ٹیم کو ہرا کر ٹورنامنٹ کو اپنے نام کر لیا ہے۔ اس موقعے پر میڈیا سے بات کرتے ہوئے الطاف ٹھاکر نے بتایا کہ ترال علاقے میں اب نوجوان کھیل کود کی طرف راغب ہو رہے ہیں جو کہ ایک خوش آیند بات ہے۔ انہوں نے کہا کہ بجونی ترال میں موجود بڑے کرکٹ میدان کی تعمیر و تجدید میں تیزی لانے کے لئے بھی وہ متعلقہ حکام کے ساتھ رابطے میں ہیں۔
