- سری نگر:۶۲،اکتوبر: صبح کے وقت دُھند اورشام کے وقت ٹھنڈکے چلتے محکمہ موسمیات نے بدھ کے روز نومبر کے پہلے ہفتے میں جموں و کشمیر کے بالائی علاقوں یعنی اونچی جگہوں پر درمیانی بارش اوربرفباری کی پیش گوئی کی ۔جے کے این ایس کے مطابق جموں وکشمیرمیں حالیہ کئی دنوں سے لوگوںکوصبح کے وقت گہری دُھند اورشام کے وقت اضافی ٹھنڈ کاسامنا کرناپڑرہاہے ،تاہم محکمہ موسمیات نے اگلے24گھنٹوں کے دوران موسم مجموعی طورپر خشک رہنے کاامکان ظاہر کیاہے ۔ اس دوران بدھ کے روز کشمیروادی میں موسم خشک رہااوردھوپ بھی نکلی ۔اُدھرماہرموسمیات اورڈائریکٹر محکمہ موسمیات سونم لوٹس نے بتایا کہ جموں و کشمیرمیں بہت سے قدرے نچلے اور اونچے علاقوں میں نومبر کے پہلے ہفتے میں ہلکی سے درمیانی بارش وبرفباری بہت زیادہ امکان ہے۔انہوںنے کہاکہ برف وباراںکی اس پیش گوئی کے امکانات75 فیصد ہیں۔انہوںنے تاہم کہاکہ نومبر کے اوائل تک جموں وکشمیرکے دونوں خطوں جموں اورکشمیروادی میں موسم خشک رہے گا۔ڈائریکٹر محکمہ موسمیات سونم لوٹس کا مزید کہنا تھا کہ برف وباراں کے اگلے مرحلے تک موسم میں کسی بھاری تبدیلی کی توقع نہیں ہے۔انہوںنے کہاکہ آج کے یعنی اسوقت تک کے تجزیے پرمبنی یہ پیش گوئی ہے تاہم آنے والے دنوں میں موسمی صورتحال زیادہ درست ہو جائے گی،اوراس حوالے سے باقاعدگی سے اپ ڈیٹ کیا جائے گا۔دریں اثناءمحکمہ موسمیات نے بدھ کی صبح کیاکہ دوران شب کشمیر وادی کے سبھی علاقوںمیں درجہ حرارت نقطہ انجماد سے اوپررہا۔محکمہ نے کہاکہ منگل اوربدھ کی درمیانی رات سری نگرمیں رات کاکم سے کم درجہ حرارت 4.7ڈگری سینٹی گریڈ،پہلگام میں 0.3ڈگری سینٹی گریڈ اورگلمرگ میں درجہ حرارت ایک اعشاریہ پانچ ڈگری سینٹی گریڈریکارڈکیاگیا۔دریں اثناءتازہ ترین اَپ ڈیٹ میں موسمیاتی ماہرین نے کہاکہ نومبر کے پہلے10دنوں میں3مرتبہ مغربی ہوائیں جموں وکشمیرمیں موسمی صورتحال کومتاثر کریں گے۔انہوںنے کہاکہ موجودہ پیش گوئی کے مطابق 31 اکتوبر تک زیادہ تر موسم خشک رہنے کا امکان ہے۔مغربی ہواﺅں کی وجہ سے جموں و کشمیر میں 31اکتوبر اور یکم نومبرکی درمیانی رات کو ہلکی بارش وبرف کی سرگرمیاں ہو سکتی ہیں۔ موسمیاتی ماہرین نے کہاکہ اس کے بعد5 اور 10 نومبر کے درمیان، جموں وکشمیرمیں درمیانی بارشوں اوربرفباری کی سرگرمیوں کے امکانات ہیں کیونکہ بیک ٹو بیک مغربی ہوائیں دومرتبہ جموں و کشمیرمیں موسم کو متاثر کرتی رہیں گی۔تاہم موسمیاتی ماہرین نے کہاکہ فی الوقت کوئی بھی درست پیش گوئی کرنا ابھی بہت جلدی ہے کیونکہ اس سے پہلے بہت دن باقی ہیں۔ موسمیاتی ماہرین نے کہاکہ کسانوں کو احتیاطی تدابیر کے طور پر فصلوں کی کٹائی اور درختوں کی ناپسندیدہ شاخوں کو کاٹنا شروع کر دینا چاہیے۔
