سنجیو ورما نے کٹھوعہ کا وسیع دورہ کیا ، وی ایف سیز ،پی آر آئیز کے ساتھ بات چیت کی

کمشنر سیکرٹری جنگلات اور ماحولیات سنجیو ورما نے کٹھوعہ کا ایک وسیع دورہ کیا جہاں انہوں نے ولیج فاریسٹ کمیٹیوں ( وی ایف سیز ) ، ولیج پنچائت پلانٹیشن کمیٹیوں ( وی پی پی سیز ) اور عوامی نمائندوں سے بات چیت کی ۔ کمشنر سیکرٹری جنگلات کے ہمراہ ڈائریکٹر سوشل فاریسٹری روشن جگی ، ڈائریکٹر سوئل اینڈ واٹر کنزرویشن ڈاکٹر ٹی ایس اشوک کمار ، چیف کنزرویٹر آف فاریسٹ ( سی سی ایف ) جموں بی ایم شرما ، ریجنل ڈائریکٹر سوشل فاریسٹ مہندر گپتا ، جوائینٹ ڈائریکٹر سوئل اینڈ واٹر کنزرویشن ابھیجیت جوشی ، ڈی ایف او کٹھوعہ وویک مودی اور ڈی ایف او بسوہلی اشونی کمار بھی تھے ۔ سب سے پہلے کمشنر سیکرٹری نے لوگیٹ ، سحر اور شیر کوٹلہ پنچائتوں کے ممبران اور لوگوں کے ساتھ بات چیت کی ۔ انہوں نے پی آر آئی کے حقیقی مطالبات کو غور سے سُنا جنہوں نے کمشنر سیکرٹری اور سینئر افسران پر زور دیا کہ وہ جنگلاتی علاقوں میں زیادہ پھل دار درخت لگا کر بندروں کے ذریعے فصلوں کی تباہی کے مسئلے کو حل کرنا ، کنڈی کے علاقے میں تالابوں اور پانی کے ذخیرہ کرنے کے ڈھانچے کے نیٹ ورک کو بڑھانا اور علاقے میں بانس کے پختہ جھنڈ کو نیلام کرنے کے بارے میں آگاہ کیا ۔ کمشنر سیکرٹری نے یقین دلایا کہ محکمہ پی آر آئیز کے تمام حقیقی مطالبات کو پورا کرنے کیلئے پر عزم ہے ۔ انہوں نے ڈی ایف اوز کو ہدایت دی کہ وہ شجرکاری کیلئے پنچائتوں کی مشاورت سے علاقوں کی پہلے سے نقشہ سازی کو یقینی بنائیں ، بانس کے پختہ جھرمٹ والے علاقوں کی نشاندہی کریں اور جنگلی حیات کیلئے پھلوں کے پودے لگائے جائیں ۔ سنجیو ورما نے ہری چک فاریسٹ نرسری کے اپنے دورے کے دوران معیاری پودوں کی ضرورت پر زور دیا ۔ وائلڈ لائف ٹریننگ سنٹر جسروٹا میں کمشنر سیکرٹری نے کٹھوعہ ضلع میں جاری گرین انڈیا مشن کی پیش رفت کا جائیزہ لیا ۔ انہیں بتایا گیا کہ کٹھوعہ ضلع کے تین فاریسٹ ڈویژنوں میں پھیلے ہوئے 271 ہیکٹر شدید طور پر تباہ شدہ جنگلاتی علاقے کی بحالی کا کام شروع کیا جا رہا ہے ۔ اس موقع پر کولی کوپر اور جسروٹا پنچائتوں کے سرپنچوں نے بھی بالترتیب کولی کوپر کے بالائی علاقوں میں پانی ذخیرہ کرنے کے ڈھانچے کی تعمیر اور جسروٹا علاقے میں لکڑی کی دستیابی کے اپنے مطالبات پیش کئے ۔ کمشنر سیکرٹری نے موقع پر ہی متعلقہ سینئر افسران کو ان مطالبات کو حل کرنے کی ہدایت جاری کیں ۔ اس موقع پر محکمہ سوشل فاریسٹری نے گورنمنٹ مڈل سکول دھلی میں ’’ آزادی کا امرت مہواتسو ‘‘ کے تحت ایک شجر کاری مہم چلائی جس میں طلباء ، پی آر آئیز ، وی پی پی سیز اور مقامی لوگ شامل تھے ۔ سرپنچ دھلی سبھاش شرما نے دھلی تالاب کی مرمت اور دھلی میں بائیو ڈائیورسٹی پارک تیار کرنے مقامی مانگ کو پیش کیا ۔ کمشنر سیکرٹری نے پرانے تالابوں کی بحالی اور کنڈی پٹی میں نئے کام شروع کر کے نچلی سطح پر پانی کے تحفظ کیلئے کام کرنے کی فوری ضرورت پر زور دیا ۔ پروگرام کا اختتام کمشنر سیکرٹری کے ذریعہ مقامی عوام میں پودے کی تقسیم کے ساتھ ہوا ۔