کولگام میںمسلح افراد کے حملے میں پنچ ہلاک

جنوبی کشمیر کے ضلع کولگام کے تولی نو پورہ گاوں میں بدھ کی شام کو مشتبہ جنگجووں نے 50 سالہ پنچ کو گولی مار کر ہلاک کردیا۔سرکاری ذرائع نے بتایا کہ بندوق برداروں نے کولگام کے تولی نو پورہ علاقے میں پنچ محمد یعقوب ڈار ولد غلام محمد ڈار ساکن تولی نو پورہ پر نزدیک سے گولیاں چلائیں جس کی وجہ سے وہ شدید طورپر زخمی ہوا۔انہوں نے کہا کہ زخمی پنچ کو علاج ومعالجہ کی خا طر فوری طورپر ضلع ہسپتال کولگام لے جایا گیا جہاں ڈاکٹروں نے اسے مردہ قرار دیا۔ذرائع نے بتایا کہ فائرنگ کے واقعہ کے بعد سیکورٹی فورسز نے تولی نو پورہ کولگام اور اْس کے ملحقہ علاقوں کو محاصرے میں لے کر تلاشی آپریشن چلایا تاہم حملہ آور فرار ہونے میں کامیاب ہو چکے تھے۔پولیس کے ایک آفیسر نے یو این آئی اردو کو بتایا کہ بدھ کی شام کو مشتبہ جنگجووں نے ضلع کولگام کے تولی نو پورہ گاوں میں پنچ محمد یعقوب ڈار پر نزدیک سے گولیاں چلائیں۔وہ بعد ازاں ہسپتال میں زخموں کی تاب نہ لاتے ہوئے دم توڑ گئے، پولیس جائے واردات پر پہنچ چکی ہے۔انہوں نے بتایا کہ ملی ٹینسی کا یہ واقع کیسے اور کن حالات میں وقوع پذیر ہوا اس کی تحقیقات شروع کی گئی ہے۔ادھرضلع ہسپتال کولگام میں تعینات ایک ڈاکٹر نے بتایا کہ 50 سالہ محمد یعقوب کوجب ہسپتال لایا گیا تو اْس کی موت واقع ہو چکی تھی۔انہوں نے بتایا کہ متوفی کے سینے اور گردن میں گولی پیوست ہوئی تھی اور جسم سے کافی خون بہہ جانے کے نتیجے میں اْس کی موقع پر ہی موت واقع ہوئی ہے۔ دریں اثنا بی جے پی کے ترجمان الطاف ٹھاکر نے یو این آئی اردو کو بتایا کہ پنچ بھاجپا کے ساتھ وابستہ نہیں تھا اور اس ضمن میں پھیلائی جانے والی افواہیں حقیقت سے بعید ہے۔