سید اعجاز
سرینگر//وسطی کشمیر کے ضلع بڈگام میں ایک شہری کو بیوی کے قتل کے الزام میں گرفتار کیا ہے ۔پولیس کے ایک اعلیٰ عہدہ دار نے بتایاجمعہ کے روز پولیس اسٹیشن بڈگام کو ایک اطلاع ملی کہ مسلمہ زوجہ غلام محمد بٹ ولد سیف الدین بٹ ساکنہ نصراللہ بڈگام، عمر تقریباً 36 سال فوت ہوگئی ہے لیکن لاش پر لگنے والے نشانات ہیں۔ موت مشکوک لگتی ہے۔ یہ اطلاع ملتے ہی تھانہ بڈگام کی پولیس پارٹی اس مکان پر پہنچی جہاں خاتون کی موت واقع ہوئی تھی اور موت کو مشتبہ پایا۔ اسی مناسبت سے سینئر پولیس افسران جائے وقوعہ پر پہنچ کر جائے وقوعہ کا معائنہ کیا۔
دوران تفتیش اور میت کے معائنے پر متوفی خاتون کے گلےپر لگنے والے نشانات پائے گئے جس کے بعد پولیس نے قانونی کارروائی کے لیے لاش کو اپنے قبضے میں لے لیا۔انہوں نے بتایا سنیچر کے روزگورنمنٹ میڈیکل کالج سری نگر میں مجسٹریٹ کی موجودگی میں مناسب ویڈیو گرافی کے تحت لاش کا پوسٹ مارٹم کیا گیا۔ اس کے ساتھ ہی متوفی خاتون کے شوہر غلام محمد بھٹ کو پوچھ گچھ کے لیے حراست میں لے لیا گیا۔ مسلسل پوچھ گچھ کے دوران، ملزم نے اپنی بیوی کو گلا دبا کر قتل کرنے کا اعتراف کیا جس کی ابتدائی پوسٹ مارٹم رپورٹ کی تصدیق کے مطابق اس نے پہلے سے منصوبہ بندی کی تھی۔مقدمہ ایف آئی آر نمبر 393/2022 U/S 302 IPC پولیس اسٹیشن بڈگام میں درج کیا گیا ہے اور تفتیش شروع کی گئی ہے۔ابتدائی تفتیش کے دوران کئی شواہد اکٹھے کیے گئے ہیں۔واضح رہے کہ متوفی خاتون (35 سال) کا تعلق کولکتہ سے تھا اور اس نے 20 دن قبل ملزم سے شادی کی تھی