جموں:۲۱، دسمبر:جموں وکشمیر کے لیفٹنٹ گورنر منوج سنہا نے پیر کو جنرل زوراور سنگھ کو ان کے یوم وصال پر خراج عقیدت پیش کیا۔لیفٹنٹ گورنر نے کہاکہ دنیا کے عظیم ترین فوجی کمانڈروں میں سے ایک، جنرل زوراور سنگھ نے اپنی بے مثال بہادری اور فوجی حکمت عملی سے ملک کا سر فخر سے بلند کیا۔ وہ آنے والی نسلوں کو ترغیب دیتے رہیں گے۔جے کے این ایس کے مطابق لیفٹنٹ گورنر منوج سنہا نے جنرل زوراور سنگھ میموریل ایجوکیشنل اینڈ چیریٹیبل ٹرسٹ کی جانب سے جنرل زوراور سنگھ کے یوم وصال کی یاد میں منعقدہ تقریب سے خطاب کرتے ہوئے جنرل زوراور سنگھ کی زندگی اور فوجی مہمات پر روشنی ڈالی۔انہوںنے کہاکہ جنرل زوراور سنگھ ہندوستان کی طاقت اور خود اعتمادی کا مجسمہ ہے۔ لیفٹنٹ گورنر نے کہا کہ اس کی بہادری، نظم و ضبط اور فرض کے تئیں لگن اس بات کی گواہی ہے کہ بہادر کےلئے کچھ بھی ناممکن نہیں اور سرفروش کےلئے لامحدود امکانات کھلتے ہیں۔منوج سنہا نے مزید کہا کہ جنرل زوراور سنگھ نسلوں کےلئے ایک ہیرﺅ ہیں کیونکہ ان کا نام مادر وطن کیلئے محبت، عقیدت اور قربانی کا مضبوط احساس پیدا کرتا ہے۔جموں وکشمیر کے لیفٹنٹ گورنر منوج سنہانے کہا کہ ہندوستان کی تاریخ میں ان کے تعاون اور اہمیت کو پوری طرح پہچاننے کی ہماری اجتماعی کوشش ہونی چاہئے۔انہوںنے ساتھ ہی کہاکہ مورخین، ادیبوں کو چاہیے کہ وہ حقیقی قومی ہیرو جنرل زوراور سنگھ کے تاریخی کارنامے پر توجہ دیں اور نئی نسل کو لداخ، بلتستان، تبت میں ان کی فوجی مہمات اور مہاراجہ گلاب سنگھ جی کے دور میں ڈوگرہ سلطنت کی توسیع میں بے پناہ شراکت کی یاد دلائی جائے
