رام بن:۸،پریل: جموں وکشمیرکے لیفٹنٹ گورنر منوج سنہا نے ہفتہ کے روز سناسر رام بن کے مقام پر جموں صوبے میں اپنی نوعیت کے پہلے ٹولپ گارڈن یعنی باغ گل لالہ کاافتتاح کرکے 40کنال پر محیط لاکھوں دلکش پھولوں سے مزین باغ کوسیاحوں ومقامی سیلانیوں کیلئے کھول دیا ۔جے کے این ایس کے مطابق ضلع رام بن کے سناسر علاقہ میں 40کنال پر قائم کئے گئے ٹولپ گارڈن یعنی باغ گل لالہ کالیفٹنٹ گورنر منوج سنہا نے ہفتہ کوکھلتی دھوپ میں افتتاح کیا۔قابل ذکر ہے کہ رام بن ضلع میں سرسبز و شاداب جنگلات کے درمیان واقع25 مختلف اقسام کے 2.75 لاکھ ٹیولپ بلب کے ساتھ 40 کنال پر پھیلا ہوا یہ باغ جموں صوبے میں اپنی نوعیت کاپہلا ٹولپ گارڈن ہے ،جس کے کھلنے سے اس علاقے میں سیاحت اور تجارتی سرگرمیوں کو بڑا فروغ ملے گا۔سناسر رام بن میں ٹیولپ گارڈن کا افتتاح کرنے کے موقعہ پر منعقدہ تقریب سے خطاب کرتے ہوئے لیفٹنٹ گورنر منوج سنہا نے کہاکہ یہاں اس دلکش باغ وپارک کے کھلنے سے اس پورے علاقے میں سیاحتی اور کاروباری وتجارتی سرگرمیوںکو فروغ ملے گا۔انہوںنے کہاکہ حکومت نے سیاحتی نقشے کو کافی وسیع کیا ہے تاکہ کچھ مخصوص مقامات کیساتھ ساتھ سیاح دور افتادہ جگہوں پر جاکر وہاںکی قدرتی خوبصورتی کانظارہ کرسکیں اور لطف اندوز ہوسکیں ۔لیفٹنٹ گورنر کاکہناتھاکہ اس اقدام کامقصد دوردراز کے علاقوں تک سیاحتی سرگرمیوںکوبڑھانا ہے تاکہ ان علاقوںمیں بھی کاروباری اور تجارتی سرگرمیوںکوفروغ دیکر یہاں کے نوجوانوں کیلئے روزگار کے مواقعے پیدا ہوں ۔انہوںنے کہاکہ سناسررام بن میں لاکھوںپھولوںسے مزین یہ ٹولپ گارڈن خوبصورتی کاایک نمونہ ہے اور ہمیں اُمید ہے کہ جس طرح لاکھوں سیاح سری نگرمیں واقع باغ گل لالہ کودیکھنے آئے ،یہاں بھی بڑی تعداد سیاح آکر اس خوبصورت جگہ کے پُرکشش نظاروں سے لطف اندوز ہونگے ۔لیفٹنٹ گورنر منوج سنہا نے مزید کہاکہ صوبہ جموں کی سیاحتی صلاحیت کئی طریقوں سے منفرد ہے۔ دلکش قدرتی خوبصورتی، بھرپور ثقافتی ورثے، شاندار کھانوں اور گرم جوشی کے ساتھ، یہ عالمی سیاحت کے نقشے پر اپنے لئے ایک جگہ بنا سکتا ہے۔انہوںنے کہاکہ انتظامیہ تمام ضروری انفراسٹرکچر اور وسائل کو یقینی بنانے کےلئے پرعزم ہے۔انہوںنے کہاکہ سیاحتی مشن پہل کے طور پر جموں و کشمیر میں 75 نئی منزلیں، 75 صوفی ومذہبی مقامات، 75 نئے ثقافتی، ورثے کے مقامات اور 75 نئے ٹریک تیار کئے جا رہے ہیں تاکہ جموں وکشمیرکے لوگوں کی امنگوں کو پورا کرنے کےلئے نئی اقتصادی راہیں کھلیں۔لیفٹنٹ گورنر کے آفس سے جاری ایک ٹویٹ میں بتایاگیاکہ جموں اور سری نگر کے جڑواں شہروں میں واٹر پارکس کی ترقی، رام بن، ادھم پور، کٹھوعہ، جموں، راجوری اور پونچھ میں ثقافتی مراکز کے قیام سے مقامی صلاحیتوں کو بڑھانے، روزگار کو فروغ دینے اور کاروباری افراد کے لیے سازگار ماحول میں مدد ملے گی۔
