سرینگر: نیشنل چائلڈ ڈیولپمنٹ کونسل (این سی ڈی سی) کی کور کمیٹی کا اجلاس حال ہی میں منعقد ہوا، جس میں اراکین نے سوشل میڈیا کے غلط استعمال پر گہری تشویش کا اظہار کیا۔ ممبران کا کہنا تھا کہ سوشل میڈیا خاص طور پر بچوں کی توجہ اپنی جانب مبذول کر رہا ہے جو کہ انتہائی تشویشناک ہے، کیونکہ آج کل ان پلیٹ فارمز کا غلط استعمال ہو رہا ہے۔ ان کا مزید کہنا تھا کہ اگر بچوں کی جانب سے سوشل میڈیا کا غلط استعمال یا ضرورت سے زیادہ استعمال کیا جائے تو یہ سائبر کرائم کے علاوہ صحت اور دیگر مسائل کا باعث بن سکتا ہے۔ کور کمیٹی کے ممبران کے مطابق، اسکول کی سطح پر آگاہی پروگرام منعقد کرنے کی اشد ضرورت ہے کہ سوشل میڈیا کو بہتر اور محفوظ طریقے سے کیسے استعمال کیا جائے۔ ممبران کا مزید کہنا تھا کہ "کاونسلنگ سیشنز بھی منعقد کیے جانے چاہئیں، تاکہ بچے سوشل میڈیا کو بہتر طریقے سے استعمال کر سکے، جو سائبر کرائم کو ختم کرنے میں مدد کرے گا۔” قابل ذکر بات یہ ہے کہ نیشنل چائلڈ ڈیولپمنٹ کونسل (NCDC) ایک خود مختار قومی چائلڈ ویلفیئر تنظیم ہے، جو ہندوستان میں بچوں کی تعلیم کو یقینی بنانے کے علاوہ خواتین اور بچوں کی بہبود کو فروغ دینے کے لیے قائم کی گئی ہے۔ کونسل کے بارے میں مزید جانکاری حاصل کرنے کے لئے آپ آفیشل ویب سائٹ https://ncdconline.org پر جاسکتے ہیں۔