سرینگر//نیشنل چائلڈ ڈیولپمنٹ کونسل (این سی ڈی سی) نے بچوں کا عالمی دن منایا، جس موقع پر کونسل کی کور کمیٹی کے اراکین نے دنیا بھر میں بچوں کو درپیش مختلف مسائل کے بارے میں بات کی۔ اراکین نے کہا کہ بچوں کو درپیش مسائل کا ازالہ ہونا چاہیے، جب کہ بچوں کے حقوق کا مکمل تحفظ ہونا چاہیے۔ این سی ڈی سی کی محترمہ شکیلہ اور بندو جیکب نے کہا ہے کہ "بچوں کو مکمل آزادی دی جانی چاہیے۔ انہیں بولنے کی آزادی، کھیلنے کی آزادی، ان کے لیے اچھے فیصلے لینے کی آزادی ہونی چاہیے، جبکہ ان کے حقوق کا تحفظ کیا جانا چاہیے، تاکہ وہ معاشرے کے لیے کارآمد شہری بنیں”۔ اسی طرح کونسل کی سودھا مینن نے کہا ہے کہ بچوں کے حقوق کے بارے میں بیداری ضروری ہے۔ انہوں نے کہا کہ ان کی زندگی خوشیوں سے بھری ہونی چاہیے۔ ریجنل ایڈمنسٹریٹو آفیسر، این سی ڈی سی، محمد رضوان نے عالمی یوم اطفال کے موقع پر غزہ میں جنگ کے دوران بچوں کے جانی نقصان پر تعزیت کا اظہار کیا ہے، جبکہ انہوں نے بھارت کی کچھ ریاستوں میں بچوں کے لیے خوراک کی کمی پر بھی تشویش کا اظہار کیا اور کہا کہ انہیں فوری طور پر کھانا دیا جانا چاہیے۔ دریں اثنا، کونسل کے ماسٹر ٹرینر، بابا الیگزینڈر نے کہا ہے کہ، "یہ دن ہمارے لیے اہم ہے، کیونکہ ہم بچوں کے حقوق اور ان کی تعلیم کے حوالے سے کام کر رہے ہیں۔” انہوں نے کہا کہ والدین کو اپنے بچوں کو حقوق دلانے میں اہم کردار ادا کرنا چاہیے، کیونکہ بچے ذہین ہوں گے تو وہ قوم کی خدمت کے لئے بہتر کام انجام دے گے”۔۔ قابل ذکر بات یہ ہے کہ عالمی یوم اطفال ہر سال 20 نومبر کو منایا جاتا ہے، جس دن مختلف ممالک میں تقریبات کا انعقاد کیا جاتا ہے۔
