پیر زادہ سعید
کرناہ //سکھ مذہب کے بانی اور پہلے گرو ،گرو نانک دیو جی کا 554ویں یوم پیدائش کرناہ کے تربونی گاﺅں میں بڑے ہی مذہبی عقیدت و جوش وخروش کے ساتھ منایا ۔اس موقعہ پر مسلمان طبقہ سے تعلق رکھنے والے لوگوں نے بھی شرکت کرتے ہوئے انہیں مبارکباد پیش کی ۔سوموار کی صبح ہی سکھ طبقہ سے تعلق رکھنے والے لوگ گردوارہ صاحب پہنچے جہاں انہوں نے اپنی عبادت اور دیگر رسومات کی ادائیگی کی ۔اس موقع پر لنگر میں بھی کئی کھانوں کا انتظام کیا گیا تھا ۔ تقریب میں ایس ڈی ایم کرناہ ڈاکٹر گلزار احمد راتھر 104 شکتی وجے بریگیڈ کے برگیڈیئر این کے داس، سول سوسائٹی کے ارکان اور دیگر طبقہ فکر ہائے سے وبستہ عہدیدران نے شرکت کی ۔اس دوران ایس ڈی ایم کرناہ اور بریگیڈر 104 انفنٹری بریگیڈ این کے داس نے اپنے خطاب میں گرو جی کو خراج عقیدت پیش کرتے ہوئے کہا کہ گرو نانک جی نے لوگوں کو امن اور محبت سے رہنے کا پیغام دیا ہے ۔معلوم رہے کہ کرناہ کے گاﺅں تربونی میں برسوں سے سکھوں کا ایک گاﺅں آباد ہے جہاں یہ لوگ مسلم طبقہ کے ساتھ ہر دکھ اور سکھ کی گھڑی میں شانہ بشانہ کھڑے نظر آتے ہیں ۔ اس موقع پر جموں وکشمیر اور پورے ملک کی سلامتی استحکام اور خوشحالی کےلئے خصوصی دعائیں کی گئیں ۔میڈیا سے بات کرتے ہوئے سماجی کارکن اور سابق انفارمیشن افسر مکھن سنگھ نے کہا کہ کرناہ سکھ مسلم بھائی چارے کی ایک منفرد جگہ ہے جہاں پر ہم ایک دوسرے سے پیار اور محبت سے رہتے ہیں ۔انہوں نے کہا کہ گرو جی نے ہمیں یہی پیغام دیا ہے کہ’ بھائی چارہ سے رہنا ، حق حلال کا کھانا ،نیک کمائی کرنا اور اللہ کی عبادت کرنا شامل ہیں ۔