سرینگر/27جنوری
جموں وکشمیر کے پہاڑی ضلع شوپیاں کے چیک نوگام گاوں میں بدھ کی شام کو سیکورٹی فورسز اور جنگجووں کے مابین گولیوں کا تبادلہ ہوا جس دوران 3 فورسز اہلکار زخمی ہوئے ہیں۔پولیس ذرائع نے بتایا کہ حفاظتی عملے کو یہ اطلاع موصول ہوئی کہ ملی ٹینٹ شوپیاں کے چیک نوگام علاقے میں چھپے بیٹھے ہیں تو پولیس اور سیکورٹی فورسز نے مشترکہ طورپر بدھ کی شام کو فوراً اس علاقے کو محاصرے میں لے لیا اور ا±نہیں ڈھونڈ نکالنے کے لئے کارروائی شروع کی۔انہوں نے بتایا کہ فرار ہونے کے تمام راستے مسدود پا کر ملی ٹینٹوں نے سلامتی عملے پر اندھا دھند فائرنگ شروع کی، چنانچہ سیکورٹی فورسز نے بھی پوزیشن سنبھال کر جوابی کارروائی کا آغاز کیا اور اس طرح سے طرفین کے مابین جھڑپ شروع ہوئی۔ذرائع نے بتایا کہ جنگجووں کی ابتدائی فائرنگ میں دو فورسز اہلکار زخمی ہوئے جنہیں علاج ومعالجہ کی خاطر فوجی ہسپتال سری نگر منتقل کیا گیا۔معلوم ہوا ہے کہ دونوں کی حالت ہسپتال میں نازک بنی ہوئی ہے۔ ذرائع کا کہنا ہے کہ فوج ، پولیس اور سی آر پی ایف نے ایک وسیع علاقے کو محاصرے میں لے کر فرار ہونے کے سبھی راستوں پر پہرے بٹھا دئے ہیں۔ذرائع نے مزید بتایا کہ سیکورٹی فورسز نے تصادم کی جگہ خصوصی جنریٹر بھی نصب کئے ہیں۔آخری اطلاعات موصول ہونے تک علاقے میں آپریشن جاری تھا۔اس سلسلے میں مزید تفصیلات کا انتظار ہے۔
