جمیل انصاری/جموں اینڈ کشمیر اکیڈمی آف آرٹ، کلچر اینڈ لینگویجز کے اہتمام سے کل یعنی26 جولائی 2023 کو گورنمنٹ گرلز ہائر سیکنڈری سکول کوٹھی باغ سرینگرمیں ایک کثیر لسانی مشاعرے کا اہتمام کیا گیا، جس میں کشمیری ،اردو، انگریزی، گوجری، پہاڑی، ہندی اور پنجابی خواتین شاعروں نے اپنا کلام پیش کیا۔ اس محفل کی صدارت کہنہ مشق شاعرہ پروفیسر نسیم شفائی نے کی جبکہ معروف براڈکاسٹر ڈاکٹر شبنم عشائی بحیثیت مہمان خصوصی ایوان صدارت میں موجود تھیں۔پروگرام کے آغاز میں سیکریٹری اکیڈیمی بھرت سنگھ منہاس(جے کے اے ایس) نے شعرا ءاور وہاں تشریف فرما مہمانوں کا استقبال کیا۔ اس پروگرام کے دوران کالج کی طالبات نے موسیقی پیش کرتے ہوئے سامعین سے دادوتحسین حاصل کی۔ مشاعرے میں نسیم شفائی، ڈاکٹر شاہدہ شبنم، ڈاکٹر نصرت اقبال، ڈاکٹر نیلوفر ناز نحوی، شائستہ بخاری، ڈاکٹر شبنم عشائی، ڈاکٹر نکہت نظر، روشن آرا، شکیلہ اختر، شازیہ کوثر، رموز بیخودی، نسرین علی، ریحانہ عزیز، ڈاکٹر صدف منشی اور شگفتہ زاہد نے اپنا کلام پیش کر کے حاضرین کو محظوظ کیا۔ محفل میں جو شخصیات موجود تھیں ان میں کالج کی پرنسپل پروفیسر نصرت بخاری، کالج کے اساتذہ اور طالبات، اکیڈیمی کے انچارج آفیسر ڈاکٹر فاروق انوار مرزا، ڈاکٹر گلزار احمد راتھر، ڈاکٹر شازیہ بشیر، نصرت جان، آفیہ قاری، اشفاق احمد، ریاض احمد کا نام قابل ذکر ہیں۔ مشاعرے کے آخر میں اکیڈیمی کے ایڈیٹر کشمیری جاوید اقبال نے تحریکِ شکرانہ پیش کیا جو کہ تقریب کے انچارج بھی تھے۔